Madaxweynaha dowlad Goboleedka Puntland Siciid Cabdullaahi Deni iyo wafdi uu hoggaaminayo, oo safar ugu maqnaa dalka dibediisa ayaa maanta dib ugu laabtay Magaalada Garoowe ee Caasimadda Puntland, ahna Xarunta Gobolka Nugaal.
Madaxweynaha Puntland ayaa maalmihii lasoo dhaafay ku sunaa Magaalada Abu Dhabi ee dalka Imaaraadka Carabta, isla markaana wuxuu dalkaas kulan kula soo qaatay Mas’uuliyiin kala duwan oo ka tirsan Imaaraadka Carabta.
Wararka ayaa intaas kusii daraya in Madaxweyne Saciid Cabdullaahi Deni uu kulan kale Magaalada Addis Ababa kula yeeshay Ra’iisul Wasaaraha dalkaas Abiy Axmed, isagoo kala hadlay Arrimo kala duwan, sida ay xaqiijinayaan ilo-wareedyo lagu kalsoon yahay .
Madaxweynaha ayaa waxaa kusoo dhoweeyay Garoonka diyaaradaha Gen. Maxamed Abshir ee Garoowe, Madaxweyne ku-xigeenka Maamulka Puntland Axmed Cilmi Cismaan Karaash, Goleyaasha Dowladda iyo qeybaha kala duwan ee Bulshada.
Madaxweyne Deni ayaa inta uu ka maqnaa Puntland waxaa Magaalada Boosaaso ka dhacay iska horimaad sababay dhimasho iyo dhaawac, kaasi oo ka dhashay is hor istaagii lagu sameeyay Guddoomiye ku-xigeenka koowaad ee Golaha Shacabka Sacdiya Yaasiin Samatar, xilli ay dooneysay inay ka degto Garoonka diyaaradaha Boosaaso.
