Madaxweynaha dowlad Goboleedka Hirshabeelle Cali Cabdullaahi Xuseen Guudlaawe iyo wafdi ballaaran oo uu hoggaaminayo ayaa goor dhow kasoo degay Garoonka diyaaradaha Aadan Cadde ee Magaalada Muqdisho.
Madaxweyne Cali Guudlaawe ayaa waxaa Garoonka kusoo dhaweeyay Xildhibnaano ka tirsan labada Golle ee Baarlamaanka, Wasiiro, siyaasiyiin iyo qeybaha kala duwan ee Bulshada oo loo diyaariyay soo dhaweyntiisa.
Madaxweynaha Hirshabeelle ayaa u yimid Caasimadda dalka ka qeyb galka Shirka Madaxda dowladda Federaalka iyo kuwa maamul Goboleedyada ee Maanta ka furmaya Teendhada Afisyooni ee xeyndaabka Xalane.
Shirkaan ayaa waxaa looga hadli doonaa dhameystirka heshiiskii 17-kii Sep iyo xalinta khilaafka ka taagan qabsoomida doorashada dalka ka dhaceysa oo Madaxda aysan weli heshiis rasmi ah ka gaarin.
Madaxda dowlad Goboleedyada dalka sida Jubbaland, Puntland, Koonfur Galbeed, Galmudug iyo Hirshabeelle oo kasoo degay Garoonka Aadan Cadde ayaa ku wada sugan Magaalada Muqdisho, kuwaasi oo ka qeyb galaya Shirka.
Shirka ayaa waxaa guddoomin doono Ra’iisul Wasaaraha Xukuumadda xilgaarsiinta Maxamed Xuseen Rooble oo Maanta si rasmi ah uga furmi doona Magaalada Muqdisho gaar ahaan Teendhada Afisyooni .
