Kulamadii xal loogu raadinayay Khilaafka Farmaajo iyo RW Rooble oo lagu kala tagay

Shirarkii lagu dhex dhexaadinayay Madaxweynaha muddo xileedkiisa dhammaaday ee Maxamed Cabdullaahi Farmaajo iyo Ra’iisul Wasaaraha Xukuumadda xilgaarsiinta Maxamed Xuseen Rooble ayaa lagu kala tagay, kaddib saacado badan oo la is hor-dhafiyey.

Shirarka oo qaatay in ka badan 10 saacadood ayaa la isku mari waayay, waxaana dadaalo kala duwan oo lagu xalinayo khilaafka Farmaajo iyo Rooble waday Madaxweyneyaasha dowlad Goboleedyada Koonfur Galbeed, Galmudug iyo xubno kale oo Guddiyo ah.

Labada dhinac ayaa isku mari waayay qodobada kala ah kiiskii Ikraan Tahliil Faarax in lagu sameeyo baaritaan madax bannaan oo hey’addaha Cadaaladda u gudubto iyo arrinta Taliyaha  Hay’adda Nabadsugida iyo sirdoonka Qaranka ee NISA.

Guddiyo ka kala socday labada dhinac ayaa loo saaray inay ka soo doodaan qodobada la isku haayay, waxaana Guddiga Farmaajo ka socday ka mid ahaa Xildhibaan C/shakuur Mire iyo Aadan Qoryooley oo ah Wasiirka Boostada Isgaarsiinta Galmudug, halka dhanka Ra’iisul Wasaaraha ay ka socdeen Wasiirka Waxbarashada iyo Wasiir kuxigeenka Warfaafinta.

Guddiga labada dhinac ayaa marka hore isku fahmay qodobada qaar, hase ahaatee qodobka la isku hayay ayaa ahaa arrinta Taliyaha NISA oo Guddiga ka socday Madaxweynaha dalbadeen in labada Taliye la isla bixiyo oo loo daayo Madaxweynaha inuu soo magacaabo, balse ay diideen dhanka Guddiga Ra’iisul Wasaaraha oo soo jeediyay haddii labada taliye la isla bixinayo ay tahay in laga heshiiyo oo laga tala geliyo Ra’iisul Wasaaraha oo cida la keenayo lagu qanacsan yahay.

Kulankii ugu dambeeyay oo dhacay wax yar kahor Aadaanka hore ee salaadii subax ee saakay ayaa dhexmaray Madaxweyne Farmaajo iyo Ra’iisul Wasaare, waxaana Farmaajo uu diiday labadaas qodob, kuna adkeystay in gorgortan aan laga geli karin, halka Ra’iisul Wasaaruhu uu mowqifkiisa ku taagnaa, taas oo sababtay in shirarka lagu kala tago.