Hay’adda QM ugu qaabilsan Arrimaha Qaxootiga ee UNHCR ayaa sheegtay inay 78,661 Qaxooti Soomaali iskooda uga soo laabteen Xeryaha Qaxootiga Kenya tan iyo bishii December ee sannadkii 2014-kii.
Qoraalka Bilaha ee UNHCR oo shalay laga soo saaray Nairobi ayaa lagu xusay inay Hay’addu taageero siisay 75,620 Qaxooti Soomaali ah oo ku sugnaa Xeradda Qaxootiga Dhadhaab ee W/Bari Kenya, halka kuwa kalena ka kala yimaadeen Xarumaha ku yaalla magaalladda.
Qoraalka waxaa kaloo lagu muujiyey inay Hay’addu sannadkan oo keliya ka taageertay inay Somalia ku soo laabtaan qaxooti tiradoodu dhamayd 2,908 qof.
Qaxootiga ku soo laabtay Somalia ayaa la sheegay inay badankooda dhulka soo mareen, halka kuwo kalena Diyaarado lagu soo daad-gureeyey.
Si kastaba ha ahaatee, Xeryaha Qaxootiga W/bari waxaa weli ku sugan Kumanaan Qaxooti Soomaali ah, kuwaasi oo ay haysato daruuf adag, iyadoo Hay’adda WFP horey u jartay saamigii raashinka ee la siin jirey Qaxootiga Soomalida.
