Maxaa Looga Hadlay Kulanka Aqalka Sare ee Baarlamaanka Federaalka Soomaaliya?
Akhrinta Koowaad ee Hindise-Sharciyeedka Dawooyinka
Guddoomiyaha Aqalka Sare ee Baarlamaanka Jamhuuriyadda Federaalka Soomaaliya, Mudane Cabdi Xaashi Cabdullaahi, oo ay wehelinayeen Guddoomiye Ku-xigeenka Koowaad Mudane Cali Shacbaan Ibraahim, ayaa maanta shir-guddoomiyay Kalfadhiga 7-aad, Kulankiisa 13-aad ee Aqalka Sare.
Ajandaha kulanka ayaa diiradda lagu saaray laba qodob oo muhiim u ah nidaamka caafimaadka iyo kan maaliyadeed ee dalka, kuwaas oo kala ahaa:
-
Akhrinta Koowaad ee Hindise-Sharciyeedka Dawooyinka
-
Akhrinta Labaad ee Hindise-Sharciyeedka Hannaanka Lacag-bixinta Qaranka
Ugu horreyn, Wasiirka Wasaaradda Caafimaadka iyo Daryeelka Bulshada ee Xukuumadda Federaalka Soomaaliya, Mudane Cali Xaaji Aadam, ayaa Golaha Aqalka Sare u soo bandhigay warbixinta Akhrinta Koowaad ee Hindise-Sharciyeedka Dawooyinka. Wasiirku waxa uu faahfaahin ka bixiyay muhiimadda uu sharcigani u leeyahay nidaaminta, tayeynta iyo sugidda badqabka dawooyinka dalka la keeno, isaga oo tilmaamay doorka uu ka qaadanayo horumarinta adeegyada caafimaadka iyo daryeelka bulshada.
Dhanka kale, Guddoomiye Ku-xigeenka Guddiga Maaliyadda ee Aqalka Sare, Mudane Ibraahim Awgaab Cismaan, ayaa Sanatarrada la wadaagay warbixinta Akhrinta Labaad ee Hindise-Sharciyeedka Hannaanka Lacag-bixinta Qaranka. Waxa uu sharraxay wax-ka-beddellada, toosinta iyo hagaajinta ay guddigu ku sameeyeen qodobada sharciga, iyagoo kaashanaya sharciyaqaannada Golaha.
Intaa kaddib, Sanatarrada Aqalka Sare ayaa galay dood iyo aragti-dhiibasho ku saabsan Hindise-Sharciyeedka Hannaanka Lacag-bixinta Qaranka, iyagoo soo jeediyay talooyin iyo fikrado lagu xoojinayo hufnaanta, daahfurnaanta iyo tayeynta nidaamka maaliyadeed ee dalka.
Ugu dambayn, Guddoomiyaha Aqalka Sare, Mudane Cabdi Xaashi Cabdullaahi, oo soo xiray kulanka, ayaa uga mahadceliyay Sanatarrada ka qayb qaatay doodda, isaga oo faray Guddiga Maaliyadda in ay dib u habeeyaan sharciga, iyagoo tixgelinaya talooyinka la soo jeediyay, si loogu diyaariyo Akhrinta Saddexaad ee kama dambaysta ah.
