Ra’iisul Wasaare Xamsa oo Xafiiskiisa Ku Qaabilay Wafdi Sare oo ka Socday Dowladda UK

Ra’iisul Wasaaraha Xukuumadda Jamhuuriyadda Federaalka Soomaaliya, Xamsa Cabdi Barre, ayaa xafiiskiisa ku qaabilay wafdi ka socday dowladda Boqortooyada Ingiriiska, oo ay hoggaaminaysay Danjiraha UK u qaabilsan Xuquuqda Aadanaha, ahna Ku-xigeenka Wakiilka Joogtada ah ee UK ee Geneva, Marwo Eleanor Sanders.

Ra’iisul Wasaaraha ayaa dowladda UK ugu hambalyeeyay kursiga ay dhowaan ku hantiday xubinnimada Golaha Xuquuqda Aadanaha ee Qaramada Midoobay, isaga oo uga mahadceliyay doorkii ay ka qaadatay qaadistii cunaqabateynta hubka, deyn-cafinta, iyo ku soo noqoshada Soomaaliya ee kursiga Xuquuqda Aadanaha ee QM.

Mudane Xamsa oo wafdiga siiyay warbixin kooban ayaa xusay in Soomaaliya ay hadda yeelatay Guddiga Madaxa Bannaan ee Xuquuqda Aadanaha, kaas oo dhowaan ay ansixiyeen labada aqal ee Baarlamaanka, isagoo tilmaamay in xubnaha guddiga lagu soo xulay karti, aqoon iyo waaya-aragnimo.

Marwo Eleanor Sanders, ayaa uga mahadcelisay Ra’iisul Wasaaraha qaabilaadda, waxayna ku bogaadisay horumarka Soomaaliya ka sameysay arrimaha xuquuqda aadanaha.

Ugu dambeyn, Ra’iisul Wasaaraha oo ay wehelinaysay Wasiirka Qoyska iyo Xuquuqul Insaanka, Marwo Khadiija Maxamed Al-Makhsuumi, ayaa Danjiraha guddoonsiiyay shahaado sharaf muujinaysa doorka UK ee garab istaagga Soomaaliya.