Guddiga doorashada dowlad Goboleedka Hirshabeelle ayaa shaaciyay qabashada doorashada afar kursi oo kamid ah kuraasta Golaha Shacabka harsan ee taalla Magaalada Baladweyne ee Xarunta Gobolka Hiiraan ee Maamulka Hirshabeelle.
Qoraal kasoo baxay Guddiga doorashada ayaa lagu sheegay inay qabanayaan doorashada afar kursi oo ah kuwo adeg, isla markaana sanadihii lasoo dhaafay ay ku fadhiyeen Xildhibaano Mucaarad ku ah dowladda Madaxweyne Farmaajo.
Guddiga ayaa caddeeyay in qabashada ergada iyo diiwaan-gelinta Musharaxiinta kuraasta lasoo saaray ay bilaabaneyso maalinta berri oo Axad ah, isla markaana maalinta Isniinta oo ay taariikhdu tahay 14-ka Maarso la qaban doono doorashada kuraasta, waxaana kuraasta ku kala fadhiyey.
1-Kursiga HOP#004 ayaa waxaa afartii sanno ee lasoo dhaafay ku fadhiyey Maxamed Xasan Qoone.
2-Kursiga HOP#011 ayaa waxaa sanadihii lasoo dhaafay ku fadhiyey Maxamed Cumar Maxamed oo mar soo noqday Wasiirkii hore ee amniga Xukuumadda Soomaaliya.
3-Kursiga HOP#063 ayaa waxaa ku fadhiyey Cabdullaahi Goodax Barre oo ahaa Wasiirkii hore ee Wasaaradda Waxbarashada Xukuumadda Soomaaliya.
4-Kursiga HOP#135 ayaa waxaa sanadihii lasoo dhaafay ku fadhiday Aamina Maxamed Cabdi.
