Guddiga doorashada dowlad Goboleedka Galmudug ayaa goordhow shaaciyay qabashada doorashada kuraas ka tirsan Golaha Shacabka Baarlamaanka 11-aad ee dowladda Federaalka, kuwaasi oo deegaan doorashadoodu tahay Galmudug.
Qoraal ay soo saareen Guddiga doorashada Galmudug ayaa lagu shaaciyay in Guddiga uu qabanayo doorashada 8 kursi oo kamid ah kuraasta Golaha Shacabka, waxaana diiwaan-gelinta Musharaxiinta ku tartamaya kuraasta ay bilaabaneysaa 12-ka bishaan Febraayo 2022.
Guddiga doorashada ayaa 8-da kursi saddex kamid ah ka dhigay qoondada haweenka, kuwaasi oo kala ah HOP048, HOP053 iyo kursiga HOP081, waxaana kuraastaas ku tartamaya oo dumar kaliya.
Doorashada kuraasta Golaha Shacabka Baarlamaanka Federaalka ay Galmudug soo saartay ayaa kala dhici laba maalmood ah oo kala ah 13-14-ka bishaan Febraayo, isla markaana waxaa ay doorashada ka dhaceysaa Magaalada Dhuusamareeb ee Caasimadda Galmudug.
