Faah faahino dheeraad ah ayaa ka soo baxaya Weerar dagaalyahano ka tirsan Al-shabaab ay ku qaadeen Gaari uu la socday Xildhibaan la sheegay inuu ka tirsan Baarlamaanka dalka Kenya, xili uu marayay duleedka Magaalada Gaarisa.
Weerarka oo ahaa mid dhabbagal ah ayaa waxaa uu ka dhacay deegaan lagu magacaabo Masalaale oo hoos yimaada Magaalada Gaarisa ee Gobolka Waqooyi Bari Kenya,waxaana lala eegtay Xildhibaan Axmed Ibraahim Cabdi Salaam.
War qoraal ah oo lagu daabacay baraha Internet-ka Al-shabaab ay ku leeyihiin ayaa waxa ay ku sheegteen Mas’uuliyada weerarkaas,iyadoo sheegay in weerarka lagu dhaawacay Xildhibaanka ka tirsanaa Baarlamaanka Kenya.
Sidoo kale Al-shabaab ayaa tilmaamay in dhaawaca Xildhibaan Ibraahim Cabdi Salaam la geeyay Isbitaal ku yaalla Magaalada Gaarisa ee Gobolka Waqooyi Bari dalka Kenya.
Ilaa iyo hada ma jiro wax war ah oo kasoo baxay dowladda Kenya oo ay uga hadlayaan wararka sheegaya in weerar lagu dhaawacay Xildhibaan ka tirsan Baarlamaanka dalkaas.
