Wakiilka Ergadda Midowga Europe u joogta dalka Kenya, Stefano Dejak ayaa Yaboohaasi ku dhawaaqay mar uu Madaxweyne-ku-xigeenka Kenya, William Ruto kula kulmay magaalladda Nairobi.
Ergayga waxa uu tilmaamay in 50 million Euro ku yabooheen, si loogu socodsiiyo Kharajka Qaxootiga Soomaalida ee dib loogu celinayo dalkooda hooyo.
Madaxweyne-ku-xigeenka Kenya, William Rutowaxa uu ka codsaday Dowladaha EU-da inay kordhiyaan Kaalmadda Lacageed ee Qaxootiga Soomaalida ee ku sugan Xerada Dhadhaab dib loogu celinayo dalkooda hooyo.
“Waxaa Kenya qaxooti ahaan ugu noolaa Hal million oo Qaxooti muddo badan, waxaana Qaxootiga lagu celiyey Heshiiska Saddex-geesoodka ee ay kala saxiixdeen Dowladaha Kenya, Somalia iyo Hay’adda QM ugu qaabilsan Arrimaha Qaxootiga (UNHCR).
Dhinaca kale, Wakiilka Ergadda Midowga Europe u joogta dalka Kenya, Stefano Dejak ayaa sheegay inay Kharajka Dowladaha Midowga Europe horey ugu ballan-qaadeen Dib-u-celinta Qaxootiga Soomaalida dhawaan la soo gaarsiin doono Dowladda Kenya.
Madaxweyne-ku-xigeenka Kenya, William Ruto ayaa ah Mas’uulkii ugu horreeyey ee ka tirsan Dowladda Kenya ee sida qayaxan u amray in Qaxootiga Soomaalida laga wada saaro Xerooyinka Kenya, isagoo ku eedeeyey inay wax ka maleegaan weeraradda Dagaalamayaasha Alsshabaab ka geystaan gudaha Kenya.
Diplomaasiyiinta Caalamka iyo Hay’adda QM ugu qaabilsan Arrimaha Qaxootiga ayaa gaashaanka ku dhuftay Eedeymaha William Ruto oo ay dacwadi kaga furan tahay Maxkamadda Caalamiga ee Dembiyadda ee ku taalla magaalladda The Hague ee dalka Holland.
© Dalsan Radio
