Wasaaradda Arrimaha Dibedda ee Turkiga waxay si kulul u cambaareysay Toogashadii shalay ka dhacday magaalladda Utrechit ee Bartamaha dalka Holland ee lagu dilay 3 qof, kuna dhaawacmeen 9 kale.
Hadal-qoraal oo ay Wasaaraddu soo saratay waxaa Tacsi loogu diray Qoysaska ay dadka kaga geeriyoodeen Toogashadaasi, waxayna Dowladda Turkiga sheegtay inay si buuxda u garab taagan yihiin Dowladda iyo Dadka Reer Holland.
Sida laga soo xigtay Warbaahinta dalka Holland waxaa lagu sheegay in Ninka geystay Toogashadaasi u dhashay Turkiga, laguna magacaabo Gokmen Tanis, kaasi oo tacshiirad ku furay Tareen marayey Barxadda 24 October ee magaalladda Utrechit.
Toogashadaasi waxaa lagu dilay 3 qof, iyadoo 9 kalena lagu dhaawacay.
Eedeysanahaasi oo 37-jir ah kuna dhashay gudaha dalka Turkiga waxaa xalay gacanta ku dhigay Boliska,kadib, markii la go’doomiyey Dhismo uu ku dhuumaalaysanayey.
Dhinaca kale, Saraakiil ka kala socda Dowladaha Holland iyo Turkiga ayaa la filayaa inay maanta kulan ku yeeshaan caasimadda Turkiga ee Ankara, iyagoo ka wada hadli doona xoojinta Xiriirka labada dal iyo Iskaashiga.
