Wargeyska ugu da’da weyn Jaraa’idka Kenya ee The Standard ayaa qoray inay Dowladda Iiraan uga digtay Saraakiisha Kenya hal Toddobaad ka hor, inta aysan Dagaalamayaasha Alshabaab bishan April 2-dii ku qaadeen Jamaacadda Garissa, oo lagu dilay ku-dhawaad 150-qof.
Wargeyska waxa uu ka soo xigtay Diplomaasi ka soo jeeda dalalka Braiga dhexe, kaasi oo sheegay inay Sirdoonka Iiraan basaasayeen Dhaqdhaqaaqyadda Alshabaab, isla markaana ay ka digeen toddobaad ka hor inta uusan dhicin Weerarkii Jamacadda Garissa.
Sirdoonka Iiraan waxay kaloo Dowladda Kenya uga digeen inay Alshabaab qorsheysteen inay weerar ba’an la beegsadaan Dadka Kirishtaanka ee ku sugan magaallooyinka Mombasa, Nairobi iyo Garissa ee u dabaal-degayey Ciidda Kirishtaanka ee Easterka.
Wargeyska The Standard waxa uu qoray inay Saraakiisha Kenya fududeysteen Warbixinta Sirdoonka Iiraan ee Weerarkii Jamaacadda Garissa.
Dhinaca kale, Xiriirka Iiraan iyo Kenya ee dhinaca Ammaanka iyo Sirdoonka ayey kala saxiixdeen bishii Feberaayo ee sannadkan, kadib, markii uu Wasiirka Arrimaha dibedda ee Iiraan, Mohamed Javad Zarif booqasho ku tegay Nairobi.
