Magaalada Muqdisho gaar ahaan Dugsiga tababarka Jeneraal Kaahiye ayaa Maanta oo jimco ah waxaa lagu qabanayaa doorashada shanta Xildhibaan ee Golaha Shacabka Baarlamaanka 11-aad ee dowladda Federaalka ee metalaya Beelaha Banaadiriga.
Guddiga Maamulka Doorashada Banaadiriga ayaa diiwaan-geliyey Musharixiin dooneysa inay u tartamaan shanta kursi ee Xildhibaanada Banaadiriga, isla markaana la siiyay shahaadada Musharaxtinimo, sida ay shaaciyeen Guddiga doorashada.
Doorashadan ayaa waxaa kuraasta tirsigoodu kala yihiin HOP#266, HOP#105, HOP#034, HOP#265 iyo HOP#084, waxaana dhammaan dadka ku fadhiyey kuraastan ay Golaha Shacabka Baarlamaanka 11-aad ku metalayeen Beelaha Banaadiriga.
21-kii bishaan Febraayo ayaa lagu waday in la qabto doorashada, balse Ra’iisul Wasaare Rooble ayaa hakiyey doorashada, kadib markii cabasho ka timid qaar kamid ah Odayaasha dhaqanka kursi tirsan kuraasta Beelaha Banaadiriga, iyadoona xal laga gaaray arrintaas.
Dhinaca kale Ciidamada Booliska dowladda Federaalka Soomaaliya ayaa Maanta xiray waddooyinka qaar ee Magaalada Muqdisho, sababo la xiriira doorashada Maanta ka dhaceysa Dugsiga tababarka Ciidanka Booliska Soomaaliyeed ee Jeneraal Kaahiye.
