Madaxweynaha Soomaaliya Maxamed Cabdullaahi Farmaajo ayaa maanta kormeer ku tagay qaar ka mid ah xeryaha ciidamada gaar ahaana Dugsiga Tababarka ee Janaraal Goordon iyo Taliska Guud, isaga oo kulamo xog wareysi ah la yeeshay saraakiisha ugu sarreeysa Ciidanka Xoogga Dalka Soomaaliyeed.
Madaxweynaha Soomaaliya oo ka hadlay arrinta mushaaradka ciidamada ayaa shaaca ka qaaday in dowladda ay ka go’antahay bixinta xuquuqdooda iyagana looga baahanyhay in ay gutaan waajibka saran oo ah difaaca dalka.
“Waxaan oofinay balamihii aad inoo dirteen oo ah bixinta mushaarka iyo raashinka oo talantaali aan aheyn ama bil dhaaf ayuu yiri Madaxweyne Maxamed C/llaahi Farmaajo.
Saraakisha ciidamada ayuu u sheegay in Soomaaliya ay ku jirto dagaaljihooyin badan ah oo kaga imaanaya dalal dano gaar ah ka leh dalka oo aan rabin in uu cagihiisa ku istaago iyo Alshabaab oo iyaguna beegsanaya shacabka ayuu yiri Madaxweynuhu.
Booqashada Madaxweynaha ee talisyada Ciidanka waxa ay ku soo beegmaysa xili Alshabaab ay weeraro qaraxyo iyo mid toos ah ay ka fulinayaan magaalada Muqdisho dhaliilo badan oo amniga ahna ay wajahayso dowladda,iyada oo ay sii dheertahay gadoodka ciidamada ka cabanaya mushaar la’aanta taas oo keentay in ay ka soo baxayaan fariisimo muhiim ah oo ku yaalla Shabeelooyinka.
Halkaan Ka Dhageyso Codka
