Wararka aan ka heleyno Magaalada Dhuusamareeb ee Caasimadda maamulka Galmudug ayaa waxaa ay sheegayaan in xalay halkaas uu ka dhacay dagaalkii ugu xooganaa.
Dagaalkan ayaa la sheegay inuu ka xooganaa kuwii shalay gudaha Magaalada ku dhexmaray Ciidanka dowladda Federaalka iyo kuwa Ahlusunna Waljamaaca, kaasi oo la isku adeegsaday hubka noocyadiisa kala duwan.
Intaas kadib Ciidanka dowladda ayaa waxaa u suura-gashay inay gudaha u gaalan Xarunta Inji oo ay degan yihiin hogaanka sare ee Ahlusunna, waxaana Ciidankii Ahlusunna ay bilaabeen inay isku dhiibaan Ciidanka dowladda, iyagoona laga dhigay hubkii ay wateen.
Wararka ayaa intaas kusii daraya in Sheekh Maxamed Shaakir iyo Macalin Maxamuud oo ah hogaamiyeyaasha Ahlusunna ay isku dhiibeen Ciidamada Dowlada Faderaalka gaar ahaan Taliyaha qaybta 21-aad iyo saraakiil sare oo qaybta ka tirsan.
Ciidamada ayaa labada hogaamiye kasoo saaray Xarunta Inji oo shalay iyo xalay uu ka socday dagaal Culus, iyagoo la sheegay in Sheekh Shaakir iyo Macalin Maxamuud ay dalbadeen in rasaasta laga joojiyo.
Wararkii ugu dambeeyay ee haatan naga soo gaaraya Magaalada Dhuusamareeb ayaa waxaa ay sheegayaan in gudaha Xarunta Inji ay guud ahaan la wareegeen Ciidanka dowladda Federaalka Soomaaliya, isla markaana waxaa istaagay dagaalo saacado badan qaatay oo halkaas ka socday.
