Wararka Idaacada Dalsan ee Magaalada Muqdisho ay ka heleyso Degmada Guriceel ee Gobolka Galgaduud ayaa waxaa ay sheegayaan in halkaas Goordhow lagu dilay qof la sheegay in uu shacab ahaa.
Dilkan ayaa waxaa uu ka dhacay Xaafad ka tirsan Degmadaas,isla markaana waxaa ay goobjoogayaal sheegeen in kooxo hubeysan oo watay Bastoolado ay fuliyeen falkaas.
Sidoo kale waxaa la tilmaamay in ragii ka dambeeyay Dilka qofka shacabka goobta ay si deg deg ah uga baxsadeen,waxaana durbo halkaas gaaray Ciidamo ka tirsan kuwa Galmudug.
Dadka deegaanka Degmada Guriceel ayaa sheegay in dhacdadan dilkan uu ku cusub yahay deegaanka,isla markaana xusay in muddooyinkii dambe aysan arag fal noocan oo kale ah.
Ciidamada amniga Degmada Guriceel aya haadan howlgalo kala duwan ka wada Xaafadaha degmadaas,iyagoona ku raadinaya kooxihii fuliyay dilkii halkaas ka dhacay.
Degmada Guriceel ee Gobolka Galgaduud ayaa kamid ah Degmooyinka aysan inta badan ka dhicin falal dilka ah oo ay geystaan kooxaha ku hubeysan Bastooladaha.
