Maleeshiyo la tuhunsan yahay inay ka tirsan yihiin Kooxda Boko Haram ayaa lagu soo waramay inay ugu yaraan 11-qof ku dileen weerar ay ku qaadeen Tuullo ku taalla Waqooyiga dalka Kaamiruun, una dhow xuduudka dalka Nigeria.
Boliska dalka Kaamiruun ayaa sheegay inay Maleeshiyadda weerareen Tuulladda Gakara ee duleedka DegmaddaKololata, halkaasi oo ay ku dileen ugu yaraan 11-qof, kuna dhaawaceen 8-kale.
Maleeshiyadda waxay kaloo dab qabadsiiyeen ugu yaraan 30 guri oo ku yaallay Tuulladaasi.
Dad badan ayaa u qaxay Xero ku taalla meel ku dhow Tuulladda Kololata, halkaasi oo hoy u ah Kumanaan qof oo ku soo barakacay dagaalka Boko Haram.
Duqa Degmadda Kololata ayaa xaqiijiyey weerarkaasi, balse, waxa uu tilmaamay inuusan ogayn tirada rasmiga ee lagu dilay weerarkaasi.
Khamiistii la soo dhaafay, 5 qof ayaa lagu dilay weerar ay Kooxda Boko Haram ku qaadeen Kolonyo gaadiid Milliteri oo maraysay Tuulladda Meleri ee Gobalka Borno ee dalka Nigeria.
Sidoo kale, Toddobaadkii la soo dhaafay, 3 haween ayaa isku qarxiyey meel ku dhow Barakacayaal oo ku taalla Tuulladda Mandarari ee dalka Nigeria, halkaasi oo ay 28 qof ku geeriyootay, halka 82 kalena ku dhaawacmeen.
