Warar dheeraad ah ayaa kasoo baxaya qarax xoogan oo Ciidamo ka tirsan kuwa Milateriga dowladda Federaalka Soomaaliya duhurnimadii Maanta lagula eegtay agagaarka wadadda Laamiga Warshadaha ee Magaalada Caasimadda ah ee Muqdisho.
Qaraxa oo ahaa miino nooca dhulka lagu aaso ah ee laga hago meelaha fog-fog ayaa waxaa gaari Tikniko oo ay saarnaayeen Ciidamo ka tirsan Milateriga uu ku qabsaday Warshada Taraqa iyo Sigaarka, xili halkaas ay socdaal ku marayeen Ciidamada.
Dad Goobjoogayaal ah oo la hadlay Idaacadda Dalsan ayaa waxaa ay ku warrameen in qaraxaas uu ka dhashay khasaaro isugu jira dhimasho iyo dhaawac oo soo saaray Ciidamada la qarxiyey, in kastoo aan si rasmi ah loo ogeyn inta uu la yahay khasaaraha.
Ciidamada ayaa qaraxa kadib rasaas xoogan kor u furay, waxaana Ciidamada dhaawacmay qaarkood lasoo saaray gaari, iyagoona halkaas isaga tegay markii dambe, mana jiro wax war ah oo kasoo baxay Saraakiisha dowladda Federaalka oo ku aadan qaraxaas dhacay.
Magaalada Muqdisho ayaa waxaa muddooyinkaan ka dhacayay qaraxyo geystay khasaaro isugu jira dhimasho iyo dhaawac, sidoo kalena ay dhaceen dilal qorsheysan oo fuliyeen rag hubeysan, waxaana inta badan falalkaas mas’uuliyadooda sheegtay Al-shabaab.
