Waxaa faah faahino dheeraad ah laga helayaa Haweeney Ajnabi ah oo u Shaqeyneysay Hay’adda ICRC oo Caawa laga afduubtay Guri ay deganeyd oo ku yaalla agagaarka hotelka Shaamow ee laami yaraha Zoobe.
Haweeneyda ayaa ilaa iyo hadda aan la ogeyn halka lala aaday,waxaana ka soo baxsaday kooxaha afduubtay Nin Soomaali ah oo markii hore lala afduubtay balse sidirqi ah kaga soo baxsaday,kadib markii gaarigii lagu afduubtay ay mid ka mid ah taayarada uu ka banjaray.
Wararkii u dambeeyey ee haatan nasoo gaaraya ayaa waxa ay sheegayaan in Guriga Haweeneyda laga afduubtay oo ay degan yihiin Ajaanib kale la geeyey Ciidamo booliska Soomaaliya ka tirsan kuwaas oo la wareegay ammaanka Shaqaalaha kale ee guriga ku sugan.
Weli lama oga cidda sida rasmiga ah uga dambeysa afduubka Haweeneydaas oo u dhalatay dalka Jarmalka,iyada oo saraakiisha Ciidamada ammaanka Soomaaliya aysan weli ka hadlin.
Dhacdadaan afduubka ah oo horay uga dhici jiray Muqdisho ayaa yaraaday sanadihii u dambeeyey balse uu mararka qaar ka dhici jiray gobolada dalka qaarkood laakin Caawa uu ka dhacay Muqdisho.
