Ciidamada Booliska maamulada Puntland iyo Galmudug ayaa saacadihi lasoo dhaafay howlgal ballaaran ka sameeyay Waqooyiga iyo Koonfurta Magaalada Gaalkacyo ee Xarunta Goboka Mudug.
Ciidamada Booliska labada maamul ayaa sigaar ah baaritaano ugu sameeynayay goobo bartilmaameed u ahaa, sidoo kalena su’aalo la xiriira dhinaca amniga weydiinayay dadka shacabka gaar ahaan dhalinyarada.
Howlgalkaan oo ay hoggaaminayeen Taliye ku-xigeenada qeybta Booliska Gobolka Mudug ee Galmudug iyo Puntland G/Le Maxamed Xasan Warsame san jeex ayaa waxaa uu ujeedkiisu ahaa xaqiijinta amniga Magaalada.
Sidoo kale Saraakiisha Ciidamada Booliska labada maamul ayaa waxaa ay sheegeen in la doonayay sidii looga hortegi lahaa falalka amni darro ee lagu dhibaateeyo shacabka ee xiliyada qaarkood ka dhaca Waqooyiga iyo Koonfurta Gaalkacyo.
Saraakiisha ayaa ugu baaqay shacabka kunool Gaalkacyo ee Galmudug iyo Puntland inay la shaqeeyaan Ciidanka Booliska, si looga hortego amni darro halkaas ka dhacda, maadaama lagu jiro Bisha barakeysan ee Ramadaan.
Magaalada Gaalkacyo oo ay labada dhinac ka kala maamulan Puntland iyo Galmudug ayaa waxaa dhowr jeer oo horey uga dhacay weeraro kala duwan iyo dilal qorsheysan, waxaana falalkaas inta badan Mas’uuliyooda sheegtay Al-shabaab.
