Boliska dalkaasi waxay sheegeen in xubno lala xiriirinayo Alshabaab ay labo weerar ka geysteen gudaha Mandheera oo lagu dilay ugu yaraan 3 qof, halka 2 kalena lagu dhaawacay.
Qoraalka ka soo baxay Boliska Kenya waxaa lagu xusay in weeraradaasi oo dhacay maalmihii la soo dhaafay ay geysteen xubno lagu tuhunsan yahay Alshabaab, kana hawlgala Mandheera, waa sida ay hadalka u dhigeen.
Boliska Kenya waxay tilmaameen in Weerarkii Koowaad oo dhacay maalintii Sabtida ee Isbuucan, iyadoo Gaari yar oo isaga kala gooshayey Degmooyinka Fiino iyo Mandheera lagu weeraray Deegaanka Kamoor Baahaw.
Sida laga soo xigtay Boliska iyo dadka Deegaanka waxaa weerarkaasi ku dhimatay haweeney xanuunsan oo loo waday Isbitaalka, halka 2 kalena uu soo gaaray dhaawacyo culus.
Haweeneyda la dilay waxaa magaceeda lagu sheegay Ruqiyo Aadan 00 50-jir ah, halka wiilkeeda oo lagu magacaabo C/qaadir Kuno uu ka dhaawacmay Bowdada.
Wargeyska The Star waxa uu Boliska Kenya ka soo xigtay in gaari kale lagu weeraray duleedka Deegaanka Fiiq, laguna dilay Aabe iyo Wiilkiisa.
Boliska waxay magacyada dadka la dilay ku kala sheegeen Mowliid Bilow iyo Wiilkiisa, Axmed Bata.
Dhinaca kale, Taliyaha Bolis Gobaleedka Mandheera, RonoBunei waxa uu tilmaaamay inay adkeeyeen Ammaanka Deegaanada uu weerarku ka dhacay, isla markaana ay Boliska ku raad-joogaan dadkii ka dambeeyey weeraradaasi.
