Guddiga doorashada Maamulka Koonfur Galbeed Soomaaliya ayaa shaaciyay Jadwalka qabashada doorashada 5 kursi oo kamid ah kuraasta Golaha Shacabka ee deegaan doorashadoodu tahay Maamulkaas.
Qoraal ay soo saareen Guddiga doorashada Koonfur Galbeed ayaa lagu sheegay in diiwaan-gelinta iyo shaacinta Guddiga soo xulista Ergada ay bilaabayaan berrito oo ay taariikhdu ku beegan tahay 24-ka bishaan Janaayo.
Guddiga ayaa xusay in diiwaan-gelinta ergada wax dooraneysa iyo tababarkooda ay bilaabaneyso 27-ka bishaan Janaayo 2022, isla markaana Musharaxiinta u tartamaya shanta kursi la diiwaan-gelinayo 29-ka bisha, lana siin doono shahaadada Misharaxiinta.
Ugu dambeyn Guddiga doorashada Maamulka Koonfur Galbeed Soomaaliya ayaa ku dhawaaqay in doorashada kuraasta shanta ah ee lasoo saaray la qabanayo 30-ka bisha, isla markaana doorashadaas ay ka dhici doonto Magaalada Baydhabo.
