Mudaaharaadyo iyo dab ka kacay magaalada Valencia ee dalka Venezuela ayaa sababtay in ay 68 ruux geeriyoodaan, sida ay saraakiisha dawladdu sheegeen.
Tarek Saab oo ah dacwad oogaha gobolka ayaa sheegay in ay si dhakhso ah u billaabi doonaan baaritaannada waxa sababay arrintaas.
Dabka ayaa la sheegay in uu Arbacadii billawday ka dib markii ay maxaabiistu dab qabadsiiyeen furaashyo iyaga oo isku dayaya in ay xabsiga ka baxsadaan.
Booliiska ayaa adeegsaday sunta dadka ka ilmaysiisa si ay ukala eryaan qaraabadii maxaabiista oo isugu yimid agagaarka xabsiga, ka dib markii uu soo baxay warka ku saabsan in uu xabsiga gubanayo.
Jesus Santander oo ah masuul ka tirsan dawladda ayaa xaqiijiyay in la toogtay askari dabka ka dib, xaaladdana gacanta lagu hayo.
Wuxuu sheegay in ay subax u ahayd gobolka Carabob marka uu dabkan ka kacay.
Qaraabada maxaabiista ayaa sheegay in qaar badan oo ka mid ah maxaabiista ay u dhinteen qiiqii oo ay ku neefqabatoobeen.
Qaar ka mid ah carruurtii iyo dumarkii booqanayay maxaabiista ayaa loo malaynayaa in ay ka mid yihiin dadka dhintay.
