Magaalada Dhuusamareeb ee Xarunta Maamulka Galmudug ayaa waxaa lagu qabtay kulan looga hadlayay isqab qabsiga dhinaca dhulalka ah ee ka jira magaaladaas,waxana ka qeyb galay Odayaasha Dhaqanka iyo Maamulka degmadaas.
Kulanka ayaa intii uu socday,waxa lagu lafa guray sidii xal looga gaari lahaa isqab qabsigaas dhulalka ,iyada oo lagu Go’aamiyay in aan qarash la gelin dhul aan aheyn mid sharci ah ama dhulka danta Guud.
Nabadoon Ciise lugey oo ka mid ah waxgaradkii kulankaas ka hadlay ayaa sheegay in dhulkii daaqa xoolaha ahaa la wada ootay,isla markaana qof walba uu doonayo in uu qori ku difaaco goofkii uu ootay.
Waxa uu sheegay in dhulka ay dowladda leedahay,isla markana cid allaala cidii dhulalkaas qarash ku bixisay ama iibsata ay dambiile tahay.
Gudoomiyaha degmada Dhuusamareeb Macalin Nuur Cilmi Cabdulle ayaa sheegay in Maamulka degmada iyo waxgaradka ay kulankoodii ku Go’aamiyen in cidii lagu arkaa dhul aysan laheyn ama iibsata sharciga lala tiigsado.
Warkaan oo faah fahsan waxaa Dhuusamareeb kas oo dirtay Wariyaheena Maryan Mire Axmed.
