Mid ka mid ah Laba Ganacsato  Soomaali oo ay Burcad Koonfur Afrikaan ah ku gubeen goobahooda ganacsiga ayaa la sheegay inuu u geeriyooday dhaawacii gubashadda ee soo gaaray.
Marxuumkaasi oo la oran jirey Ibrahim Rana ayaa la sheegay in 80% jirkiisa wada gubtay, iyadoo lagu daaweynayey Qeybta Daryeelka Gaarka ee Isbitaalka George Mujhari.
Marxuumka waxaa isaga iyo Ganacsade kale oo magaciisa lagu soo koobay Ismaaciil lagu gubay goobtooda ganacsiga oo ku taalla Deegaanka Soshanguve.
Milkiilaha dhismaha Ganacsiga ayaa u sheegay inay Burcadda dab qabadsiiyeen Dukaanka Soomaalida, ka hor intaysan boobin dhamaan raashinkii, lacagtii iyo Kaararka ku-hadalka ee yiillay Dukaankaasi.
Dhinaca kale, Boliska waxay soo xireen 9 Burcad ah, kuwaasi oo isbuucii hore boobay goobo ganacsi oo ay Soomaalida ku lahaayeen Tuulladda Garoot Drakensten oo u dhow Degmadda Paarl.
Tuugadaasi oo ka yimid Degmadda Mbekwweni ayaa la soo taagay maxkamadda Degmadda Paarl, waxaana lagu soo oogay inay geysteen boob, burburin hantiyeed iyo inay weerareen Ganacsato, kana dhaceen hanta badan.
Wargeyska The Pretorua News  ayaa la sheegay inuu boobkaasi dhacay, kadib, markii uu khilaaf dhex maray Ganacsadaha Soomaaliga iyo dad macaamil u ahaa.
Xigasho:- Pretoria News
