Ciidanka Xoogga Dalka Soomaaliyeed ayaa saacadihii lasoo dhaafay hawlgallo muhiim ah ka fuliyay degaannada ku yaal jiinka wabiga Shabeelle ee gobolka Hiiraan.
Howlgalladan waxaa qayb ka ahaa Ciidanka Xoogga Dalka, NISA, iyo ciidanka deegaanka ee Macawisleyda, oo si wadajir ah u qaaday tallaabooyin amni iyo xasilooni u soo celinaya degaannadaas.
Taliyaha Ciidanka Dhulka ee XDS, Taliye Sahal, ayaa hoggaaminayay hawlgallada, isagoo sidoo kale warbaahinta la hadlay si uu uga warbixiyo guulaha la gaaray.
Taliye Sahal wuxuu xaqiijiyay in ciidamada ay si wanaagsan uga guuleysteen howlgalada, isla markaana ay ku sii socdaan gobalada Hiiraan iyo Shabeellaha Dhexe, kuwaas oo ay ka soconayaan hawlgallada si loo xoojiyo amniga.
Saraakiishu waxay ku adkeeyeen in howlgalladu ay sii socon doonaan, iyadoo la rajeynayo in la xaqiijiyo xasilooni waarta oo lagu soo celiyo amniga guud ee gobolka. Ciidamada ayaa sidoo kale ka go’an in ay sugaan nabadgelyo iyo deganaansho waarta oo ka faa’iideysanaya dhammaan bulshada degaanka.
