Faah faahino kala duwan ayaa kasoo baxaya dagaal khasaare badan dhaliyay oo ka dhacay degaan lagu magacaabo Dawacaaley oo ka tirsan degmada Xarshin ee gobolka Faafan ee dowlad-degaanka Soomaalida Galbeed.
Dagaalka ayaa lagu soo warramayaa inuu weli socdo, iyadoo marba marka ka dambeysa uu dagaalku sii xoogaysanayo.
Wararka aan helnay waxay sheegayaan in dagaalka u dhexeeyo ciidamada Amniga dowlad-degaanka Soomaalida iyo maleeshiyaad hubaysan oo ka horyimid nidaamka dowliga ah ee maamulkaasi.
Dagaalka ayaa sababay khasaare dhimasho iyo dhaawac leh, waxaana illaa iyo hadda aan la helin xog rasmi ah oo ku saabsan tirada rasmiga ah ee dadka ku geeriyooday iyo kuwa ku dhaawacmay.
Saraakiisha Amniga dowlad-degaanka Soomaalida Galbeed ayaa xaqiijiyay in ay gacanta ku dhigeen gaadiid ay wateen maleeshiyaadka ka qayb qaatay dagaalka subaxnimadii saaka, waxayna sidoo kale sheegeen in hawlgallo sii socda ay ka socdaan si loo soo afjaro maleeshiyaadkaasi.
Xaalada deegaanka ayaa weli ah mid kacsan, waxaana laga cabsi qabaa in dagaalku uu sii faafiyo haddii aan si degdeg ah loo qaadin tallaabooyin lagu xakameynayo.
