Taliska ciidanka Booliska dowladda Federaalka Soomaaliya ayaa maanta oo Axad ah degmada Deyniile ee magaalada Muqdisho kusoo bandhigay hoobiyeyaal iyo hub kale oo tiro badan, kuwaasi oo lagu soo qabtay howlgal ay ciidanka ammaanka sameeyeen.
Afhayeenka ciidanka Boolisak Qaasim Axmed Rooble oo Warbaahinta la hadlay ayaa sheegay in laamaha amniga ay gacanta kusoo dhigeen illaa 140 xabo oo hoobiye ah iyo hub kale, kadib howlgalo laga fuliyay qeybo kamid ah gudaha caasimadda Muqdisho.
Dhinaca kale Afhayeenka ayaa ka hadlay laba hoobiye oo saqdii dhexe ee xalay kusoo dhacay degmooyinka Boondheere iyo Cabdicasiis, waxaana mid kamid ah uu si gaar ah ugu dhacay xerada gaadiidka Booliska oo ku taalla Cabdicasiis.
Ugu yaraan hal askari oo ka tirsan ciidanka Booliska dowladda ayaa ku dhaawacmay madfaca ku dhacay gaadiidka Booliska, mana jiro khasaaro oo ka dhashay falkaasi.
Muddooyinkii u dambeeyay ammaanka magaalada Muqdisho ayaa soo hagaagay, inkastoo mararka qaarkood ay caasimadda ka dhacaan dilal qorsheysan oo ay geystaan rag dhallinyaro ah oo bastoolado ku hubeysan.
