Madaxweynaha dowladda Federaalka Soomaaliya Xasan Sheekh Maxamuud iyo wafdi uu hoggaaminayay ayaa gaaray magaalada Garoowe ee Xarunta Gobolka Nugaal, halkaasi oo siweyn loogu soo dhaweeyay Madaxweynaha.
Xasan Sheekh ayaa waxaa Garoonka diyaaradaha Garoowe kusoo dhaweeyay Madaxweynaha Maamulka Puntland Saciid Cabdullaahi Deni, qaar kamid ah Madaxda maamulada ee halkaasi jooga, xubno kala duwan iyo dadweyne farabadan.
Madaxweynaha dowladda Federaalka ayaa magaalada Garoowe uga qeyb galaya caleemo-saarka Madaxweynaha dib loo doortay ee Maamulkaasi Saciid Cabdullaahi Deni iyo ku-xigeenka Ilyaas Cismaan Lugatoor.
Sidoo kale Madaxda dowlad Goboleedyada, Galmudug, Hirshabelle iyo Koofur Galbeed ayaa caleema saarka ka qeyb galaya, iyadoo Madaxweynaha Jubbaland Axmed Madoobe uu ka baaqsaday sababo la xiriira khilaafka isaga iyo Madaxweyne Deni oo wixii ka dambeeyay doorashadii Federaalka ee 15 May 2022 uu xiriirkooda xumaaday.
Madax hore iyo wafuud ka kala socda dowladda Kenya, Jabuuti iyo Dowlad deegaanka Soomaalida, xubno ka socda Safiirada dalalka Caalamka ayaa sidoo kale ka qeyb galaya xaflada caleema saarka.
