Waxaa Maanta magaalada Muqdisho ka socda banaanbaxyo waaweyn oo looga soo horjeedo damaca dowladda Itoobiya ee ku aadan Badda Soomaaliya, kadib heshiiskii uu Madaxweynaha Maamulka Somaliland u saxiixay Ra’iisul Wasaare Abiy Axmed.
Boqolaal dadweyne iyo mas’uuliyiin ka tirsan dowladda Federaalka ayaa isugu soo baxay fagaaraha Daljirka daah-soon ee degmada Boondheere ee Gobolka Banaadir, waxaana dhammaantood ay kasoo horjeedan damaca Itoobiya ay ku dooneyso Badda Somalia.
Sidoo kale dad farabadan ayaa iyaguna ku sugan isgoyska KM-4 ee Muqdisho, dadka dhigaya banaanbaxa ayaa ku qeylinaya erayo ka dhan ah Itoobiya oo ku kacday xadgudub ka dhan ah madax bannaanida dhuleed ee Soomaaliya.
Goobaha waxbarashada iyo ganacsiyada ayaa sidoo kale la xiray, kadib markii ay amartay dowladda Soomaaliya oo iyadu soo qaban-qaabisay dibadbaxaan.
Ammaanka guud ee caasimadda Muqdisho ayaa Maanta siweyn loo adkeeyay, isla markaana waxaa xiran waddooyinka oo ay ku sugan yihiin ciidanka ammaanka dowladda oo hakad geliyay isku socodka gaadiidka.
