Ciidamada Xoogga dalka iyo kuwa deegaanka oo kaashanaya diyaaradaha aan duuliyaha laheyn ee Mareykanka ayaa xalay iyo saaka waxa ay howlgalo qorsheysan oo dhan ah dagaalamayaasha Al-Shabaab ay ka wadaan qeybo kamid ah Gobolka Hiiraan.
Howlgalka oo saacado badan qaatay ayaa si gaar ah uga dhacay Tuulada Hilow Bacaad oo sideed kilo mitir dhinaca Koonfur galbeed ka xigta deegaanka Halgan ee Gobalka Hiiraan ee dowlad Goboleedka Hirshabeelle.
War kasoo baxay dowladda laguna baahiyay Telefashinka ku hadla afka dowladda Soomaaliya ayaa lagu sheegay in howlgalka oo wali socda lagu dilay in ka badan 60-dagaalyahan oo katirsan Al Shabaab tiro kale oo badana lagu dhaawacay.
Dowladda ayaa sidoo kale sheegtay in howlgalkan lagu bur buriyay fariisimo ay lahaayeen kooxda Al Shabaab , waxaa sidoo kale howlgalka lagu bur buriyay saanad Al Shabaab lahaayeen, waa sida Warka loo dhigay.
Wararkii ugu danbeeyay ee laga helayo Tuulada Hilow Bacaad ayaa sheegaya in xaaladda ay tahay mid kascsan, waxaana lagu soo warramayaa in ciidamada xoogga iyo deegaanka ay dhaq-dhaqaaqyo ciidan ka wadaan halkaasi.
