Wabiga Shabeelle ee dhexmara magaalada Baladweyne ee Xarunta gobolka Hiiraan ayaa xalay illaa saaka ku fatahay qeybo ka mid ah xaafadaha Baladweyne, sida ay sheegayaan wararka aan ka heleyno Baladweyne ee Maamulka Hirshabeelle.
Webiga ayaa biyo farabadan keenay xaafadaha Bundaweyn iyo Howlwadaag, kadib markii uu webiga jabsaday karkaarka, waxaana saacadihii lasoo dhaafay laga cabsi qabay fatahaada uu sameeyay webiga. Biyaha ayaa dhex ceegaaga waddooyinka iyo guryaha.
Magaalada Baladweyne ayaa waxaa hore uga barakacay dadkii ku dhaqanaa gudaha magaalada, kuwaas oo u barakacaya dhulka taaga ah oo aysan biyaha galin si ay uga baxsadaan halista ka dhalan karta biyaha wabiga Shabeelle.
Maamulka magaalada oo la hadlay warbaahinta ayaa u sheegay in illaa iyo hada uusan jirin wax khasaare nafeed ah oo ay geysteen fatahaada ku dhufatay inta badan xaafadaha Baladweyne.
Si kastaba dowladda Federaalka Soomaaliya ayaa muddooyinkii ugu danbeeyay ka digeysay fatahaadaha ay sameeyeen webiyada Jubba iyo Shabeelle, oo ku fatahay magaalooyinka gaar ahaan webiga jubba oo ku fatahay degmooyinka Gobolka Gedo, halkaasi oo haatan ay ka taagan tahay xaalad adag.
