Qarax miino nooca dhulka lagu aaso ah ee laga hago meelaha fog-fog ayaa waxaa saaka laamiga dheer ee degmada Deyniile gaar ahaan halka loo yaqaan Ceelka Ifis lagula beegsaday gaari ay saarnaayeen Ciidamo ka tirsan dowladda Federaalka Soomaaliya.
Khasaaro dhaawacyo ah ayaa ka dhashay qaraxa oo gaaray dad shacab ah oo wadada xilliga uu qaraxu dhacaayay marayay, halka sidoo kalena khasaaro uu gaaray Ciidanka lala beegsaday oo saarnaa gaari nooca Soomaalida u taqaano Tikniko.
Dad goobjoogayaal ayaa waxaa ay kusoo warrameen in qaraxa ay ku dhaawacmeen laba qof oo shacab ah, sidoo kalena ay jiraan khasaaro gaaray Ciidankii lagu qarxiyey laamiga dheer ee degmada Deyniile gaar ahaan halka loo yaqaan Ceelka Ifis.
Ciidankii saarnaa gaariga la qarxiyay ayaa dhankooda rasaas culus furay, waxaana goobta uu qaraxu ka dhacay gaaray ciidamo isugu jira milatari iyo Booliis kuwaa oo baaris ka wada qaraxa dhacay iyo ciddii ka dambeesay.
Laamaha ammaanka dowladda Federaalka Soomaaliya ayaan weli ka hadlin qaraxaas ka dhacay magaalada Muqdisho, falalka amni darro sida qaraxyada iyo dilal qorsheysan ayaa muddooyinkii dambe kusoo badanayey qeybo kamida ah Muqdisho.
