Waxaa Maanta oo Arbaco ah Magaalada Kismaayo ee Xarunta Gobolka Jubbada Hoose ka dhacday doorashada saddex kursi oo kamid ah kuraasta Golaha Shacabka Baarlamaanka 11-aad, kuwaasi oo deegaan doorashadoodu tahay Maamulka Jubbaland.
Doorashada kursiga tirsigiisu yahay #HOP126 ee Maanta ka dhacday Kismaayo ayaa waxaa ku tartamay laba Musharax oo kala ahaa Xasan Xuseen Maxamed Xasan Elaay oo ah Wasiirka Gaadiidka Maamulka Koonfur Galbeed iyo Cabdiraxman Macalin Xuseen.
Wasiir Xasan Xuseen Elaay ayaa ku guuleystay doorashada kursiga #HOP126, isagoona helay helay codad gaaraya 74 Cod, halka Musharaxii la tartamayey uu isna helay 21 Cod, isla markaana waxaa la sheegay inay 5 Cod ka halaawday doorashadaas.
Doorashada kursiga #HOP127 ayaa kusoo baxay oo loo doortay Dr. Axmed Aadan Axmed oo helay 84 Cod, waxaana uu ka guuleystay Musharaxii tartanka kula jiray ee Cabduqaadir Cabdullahi Xirsi oo isna helay 16 Cod, hal Codna wuu halaabay.
Doorashada kursigii ugu dambeeyay ee ka dhacday Kismaayo oo tirsigiisu yahay #HOP118 ayaa Cod gacan taag ah loogu coddeeyay Yuusuf Maxamed Ismaaiil, kadib markii uu tanaasulay Musharaxii la tartami lahaa ee Cumar Maxamed Cumar.
Gudsoomiyaha Guddiga Hirgalinta Doorashooyinka heer dowlad Goboleed ee Jubaland SEIT Dr Siyaad Maxamed Mursal ayaa ku dhawaaqay dhammaan Natiijooyinka doorashada kuraastii Maanta ka dhacday Kismaayo oo ay goobjoog ka ahaayeen wafdi ka socday Guddiga doorashooyinka heer Federaal.
