Ergayga Gaarka ee Ururka Midowga Afrika ugu qaabilsan Arrimaha Somalia, ahna Madaxa Ciiddanka AMISOM, Ambassador Francisco Madeira waxa uu shalay ku dhawaaqay inay 3 maalmood u baroor-diiqi doonaan geeridii ku timid Ku-simihii Taliyihii Ciiddanka Booliska AMISOM, Christine Alalo oo ka mid ahayd 157-dii qof ee ku geeriyootay Diyaaradii Ethiopian Airlines ee bishan 10-di ku burburtay duleedka Addis Abeba.
Ambassador Francisco Madeira waxa uu hadalkaasi ka sheegay munaasbad ay shalay isugu yimaadeen Shaqaalaha AMISOM iyo kuwa QM ee ku sugan Muqdisho, kuwaasi oo wada saxiixay buugga tacsida ee la dhigay Xarunta Dhexe ee AMISOM ee Muqdisho.
Waxa uu tilmaamay in Calamadda Ururka Midowga Afrika hoos loo dhigi doono muddada lagu jiro Baroor-diiqa loo samaynayo Ku-simaha Taliyihii Booliska AMISOM iyo dadkii kale ee ku geeriyootay shilkii Diyaaradda Ethiopian Airlines ee nooceedu ahaa Boeing 737 Max 8.
Dhinaca kale, Ku-simihii Taliyihii Ciiddanka Booliska AMISOM, Christine Alalo oo u dhalatay dalka Uganda waxay Hawlgalka AMISOM ku soo biirtay bishii June ee sannadkii 2015-kii, iyadoo xilka Ku-xigeenka Taliyaha Booliska AMISOM haysay tan iyo bishii November ee sanadkii 2017-kii.
Waxayna kadib u dallacday Ku-simaha Taliyaha Booliska AMISOM oo ay haysay tan iyo markii ay ku geeriyootay Shilka Diyaaradeed ee ka dhacay duleedka Addis Abeba, xilligaasi oo ay ka soo laabtay Shirweyne ay kaga soo qeyb gashay caasimadda dalka Talyaaniag ee Rooma.
