Wasiirka Wasaaradda Qorsheynta, Maalgashiga iyo Horumarinta Dhaqaalaha ee Dowladda Federaalka Soomaaliya, Mudane Maxamuud C. Sheekh Faarax (Beenebeene), ayaa khudbad rasmi ah ka jeediyay Shirka Heer Wasiir ee Golaha Dhaqaalaha iyo Arrimaha Bulshada ee Qaramada Midoobay (ECOSOC), isagoo weheliya Agaasimaha Guud ee Hay’adda Istaatistikada Qaranka, Dr. Cabdisalaam Cabdiraxmaan Maxamed. Wasiirku waxa uu iftiimiyay guulaha taariikhiga ah ee dalka ka gaaray dib-u-habeynta dhaqaalaha, dowlad-dhiska iyo dimuqraadiyeynta .
Khudbaddan ayaa muhiim u ah, sababtoo ah waxay ka dhigan tahay Soomaaliya oo horumar xasaasi ah ka sameysay heer caalami ah, iyadoo ECOSOC uu yahay mid ka mid ah golaha ugu muhiimsan ee Qaramada Midoobay oo diiradda saaraya horumarinta dhaqaalaha iyo arrimaha bulshada . Soomaaliya waxay ka mid tahay dalalka xubnaha ka ah ECOSOC tan iyo 1971.
Wasiirku waxa uu xusay guulo muhiim ah oo dalka ka gaaray, oo ay ka mid yihiin dhammaystirka Barnaamijka Deyn Cafinta (HIPC Completion Point), qaadista cunaqabateyntii hubka ee Qaramada Midoobay, hirgelinta doorashooyinka qof iyo cod ee ugu horreeyay muddo ka badan 50 sano, iyo doorashada Soomaaliya ee Golaha Ammaanka ee Qaramada Midoobay.
Wuxuu yidhi: “Qorshaha Isbeddelka Qaranka (NTP 2025–2029) wuxuu yahay tubta hagaysa horumarka dalka, isla markaana uu saldhig u yahay u-guurista horumar waara oo ku dhisan kobac dhaqaale, maalgashi iyo hoggaan qaran.” Wasiirku waxa uu sheegay in dalka si tartiib tartiib ah looga gudbayo ku-tiirsanaanta gargaarka bani’aadannimo.
Waxaa intaas dheer, Wasiirku waxa uu xusay in Soomaaliya ay horumar muuqda ka sameysay qorsheynta ku saleysan xogta, xoojinta nidaamka tirakoobka qaranka iyo horumarinta go’aan-qaadashada ku dhisan caddeymo, kuwaas oo sare u qaaday dabagalka iyo qiimeynta horumarka laga gaarayo Yoolalka Horumarka Waara (SDGs).
Doodaha ECOSOC waxay diiradda saareen “Transformative, equitable, innovative and coordinated actions for the 2030 Agenda for Sustainable Development and its Sustainable Development Goals for a sustainable future for all”. Soomaaliya waxay ku soo bandhigtay qorshaheeda iyo hiigsigeeda horumarineed goobtan caalamiga ah.
Gabagabadii, Wasiirku wuxuu ugu baaqay saaxiibbada horumarinta inay sii xoojiyaan iskaashiga, isla markaana ballanqaadyadooda u beddelaan ficil muuqda oo lagu taageerayo mudnaanta horumarineed ee dalka. Wuxuu xusay in iskaashi dhab ah iyo maalgashi joogto ahi ay muhiim u yihiin dardargelinta hirgelinta Yoolalka Horumarka Waara iyo dhismaha Soomaaliya nabdoon, barwaaqo leh, isla markaana waarta.
