TUBSAN iyo Talyaaniga oo xoojinaya dagaalka argagixisada
Muqdisho, 06 Juun 2026 – Agaasimaha Guud ee Xarunta Qaran ee Ladagaallanka Argagixisada iyo Kahortagga Fikirka Xagjirka ah ee Tubsan, Mudane Cali Yaasiin Gurbe, ayaa kulan muhiim ah la qaatay Hoggaanka Ciidanka Qaranka Talyaaniga (IT-NCC), Col. Marco De Gruttula, oo ka hawlgala Soomaaliya, iyadoo labada dhinac ay ka wada hadleen xoojinta wada-shaqaynta iyo dardargelinta hawlaha lagu dagaallamayo argagixisada iyo fikirka xagjirka ah.
Kulankan ayaa yimid iyadoo xarunta dhaqan-celinta ee Serendi ay ka mid tahay meheradaha muhiimka ah ee lagu soo celiyo dhalinyarada ka soo laabata kooxaha xagjirka ah, iyadoo iskaashiga Soomaaliya iyo Talyaanigu uu muddo dheer ka shaqeynayay dib-u-dhiska kaabayaasha iyo tababarka.
“Waxaan uga mahadcelinayaa Ciidanka Talyaaniga dadaalka hagar-la’aanta ah ee ay u muujiyeen fulinta ballan-qaadyadii qaybta ka ahaa dib-u-habaynta kaabayaasha xarunta dhaqan-celinta ee Serendi,” ayuu yiri Mudane Cali Yaasiin Gurbe. “Mashaariicda la fuliyay – oo ay ka mid yihiin garoonka kubadda kolayga, fasalka lagu barto xirfadda harqaanka, iyo jikada guud – waxay isbeddel muuqda ku soo kordhiyeen nolosha iyo tababbarka dhalinyarada.”
Agaasimaha ayaa intaas ku daray in dowladda Soomaaliya ay diyaar u tahay joogtaynta iyo xoojinta iskaashigan muhiimka ah, isagoo uga mahadceliyay hoggaanka IT-NCC hadiyaddii ay guddoonsiyeen.
Hoggaanka Iskaashiga Rayidka iyo Ciidanka (CIMIC) ayaa Agaasimaha Guud ee Tubsan guddoonsiiyay hadiyad gaar ah, taas oo astaan u ah xiriirka wadashaqayn iyo saaxiibtinimo ee qotadheer. Col. Marco De Gruttula ayaa sheegay in Talyaanigu uu sii wadi doono taageerada xarunta Tubsan, gaar ahaan dhinacyada awood-u-qaadista iyo qalabaynta.
Tallaabooyinkan dhaxal-galka ah ayaa qayb ka ah dadaalka ay Xarunta Qaran ee Tubsan ugu jirto sidii dhalinyarada ka soo laabanaysa fikirka xagjirka ah loogu diyaarin lahaa dib-u-dhaqan-celin dhammaystiran, iyadoo la siinayo xirfado ay noloshooda ku maareeyaan, doorna uga qaataan nabadda iyo xasilloonida dalka.
