FESTU: “Wadahadal la’aan ma jirto nabad”
Geneva, Switzerland – 6 June 2026 – Xoghayaha Guud ee Ururka Shaqaalaha Soomaaliyeed (FESTU), Mudane Omar Faruk Osman, ayaa maanta ka qayb qaatay kulan heer sare oo lagu hadlayay “Wadahadalka Bulshada 50-ka Sano: Casharo Mustaqbalka,” oo ka dhacay dhanka shirka 114-aad ee Ururka Shaqada Caalamiga (ILC), halkaas oo uu la saarnaa wasiiro iyo dublomaasiyiin caalami ah, kana wadaagay waayo-aragnimada Soomaaliya ee horumarinta wadahadalka saddex geesoodka ah (dowlad, shaqaale iyo loo-shaqeeyayaal).
Kulankan ayaa yimid iyadoo ay jirto 50 sano laga dhashay Heshiiska ILO ee lambarka 144 ee ka shaqeeya tashiga saddex geesoodka. Soomaaliya, oo soo martay in ka badan toban sano oo lagu ciribtirayay ururada shaqaalaha, ayaa si tartiib tartiib ah u soo celisay wadahadalka, kaas oo gacan ka geystay isbeddelka xiriirka shaqada, dhisida kalsoonida, iyo ansixinta sharciyada shaqada.
“Wadahadalka bulshadu maaha geedi socod tashi oo kaliya, mana aha fulinta shuruudo habraac. Waa aasaaska nabad bulsho, caddaalad bulsho iyo horumar waara,” ayuu yiri Omar Faruk. “Iyadoo ay jirto kala qaybsanaan iyo hubanti la’aan oo sii kordheysa, wadahadalku maaha wax raaxo ah, balse waa lama huraan si loo dhiso kalsooni, loo xaqiijiyo caddaalad, loona gaaro horumar waara.”
Xoghayuhu waxa uu ku adkeeyay in ururada shaqaalaha aysan ahayn kuwa daawanaya wadahadalka, balse ay yihiin ka qaybqaatayaal lama huraan u ah qaabeynta mustaqbalka shaqada. Waxa uu sheegay in wadahadalka waxtarka lehu uu tahay inuu noqdo mid horudhac ah, oo aan ahayn mid fal-celin keliya ah, si dowlado, loo-shaqeeyayaal iyo shaqaale ugu wada shaqeyn karaan caqabadaha iyo fursadaha soo ifbaxaya.
Kulanka waxaa ka qayb galay wasiirka Saint Lucia, danjiraha Midowga Yurub, iyo la-taliyaha Ururka Loo-shaqeeyayaasha Kazakhstan. Dhammaan waxay ku booriyeen muhiimadda wadahadalka, iyadoo Omar Faruk ugu dambeyntii xusay in FESTU ay la safan tahay shaqaalaha iyo ururada shaqaalaha adduunka oo dhan ku soo celcelinaya fariinta: “Horumarka ugu xoogan, ugu ballaaran, ugana waaraya waa kan lagu dhisay wadahadal.”
