Soomaaliya oo ansixisay qorshe biyaha $232 milyan
Muqdisho, 01 June 2026 – Sanduuqa Qaranka ee Maalgelinta Cimilada (NCF) oo kaashanaya Wasaaradda Tamarta iyo Khayraadka Biyaha (MoEWR), iyadoo taageereysa Hay’adda Caalamiga ah ee Biyaha (GWPSA), ayaa maanta si guul leh ugu qabtay magaalada Muqdisho Shirweynaha Ansixinta Qaranka ee Mashruuca Amniga Biyaha Magaalooyinka iyo Barnaamijka Maalgashiga Biyaha Soomaaliya (WIP) 2026–2030, kaas oo lagu qiyaasay USD 232 milyan.
Shirkani wuxuu muhiimad gaar ah u leeyahay Soomaaliya, oo ka mid ah dalalka ugu nugul isbeddelka cimilada, iyadoo abaaraha soo noqnoqda iyo fatahaadaha daadadka ay burburiyaan kaabayaasha biyaha. Ansixinta qorshahan waxay u ogolaanaysaa dowladda in ay hirgeliso mashaariic dhab ah oo lagu xoojinayo adkaysiga biyaha lix magaalo oo nugul ah.
“Ansixinta mashruuca kaydinta biyaha roobka iyo barnaamijka maalgashiga biyaha waxay caddayn u tahay sida ay dowladda uga go’an tahay la dagaallanka saameynta isbeddelka cimilada,” ayuu yiri mas’uul ka tirsan MoEWR oo ka hadlay shirka. “Waxaan maalgelineynaa mustaqbalka dadkeenna iyo deegaankeenna.”
Ka qeybgalayaasha ayaa ansixiyay mashruuca “Nidaamyada Kaydinta iyo Gurashada Biyaha Roobka ee Magaalooyinka Nugul” oo lagu qiyaasay USD 25.8 milyan, kaas oo lagu hirgelinayo magaalooyinka Xuddur, Garbahaarey, Matabaan, Dhuusamareeb, Laascaanood iyo Badhan. Mashruucu wuxuu diiradda saarayaa dhismaha kaabeyaasha gurashada iyo kaydinta biyaha roobka, xoojinta nidaamyada xogta iyo saadaasha cimilada, iyo horumarinta maamulka biyaha heer degmo.
Sidoo kale, waxaa la ansixiyay Barnaamijka Maalgashiga Biyaha Soomaaliya (WIP) 2026–2030 oo ay hoggaaminayso MoEWR, kaas oo qorshe maalgashigiisu yahay USD 232 milyan. Barnaamijku wuxuu taageeri doonaa biyo-gelinta, kaydinta biyaha, maareynta fatahaadaha, horumarinta biyaha dhulka hoostiisa, waraabka, nadaafadda, adkaysiga cimilada, iyo xoojinta hay’adaha dowliga ah.
Qorshahan waxay la jaanqaadaysaa Qorshaha Horumarinta Waaxda Biyaha, Qorshaha Qaranka ee La-qabsiga Cimilada (NAP), NDC 3.0, Qorshaha Isbeddelka Qaranka iyo Barnaamijka Maalgashiga Biyaha Afrika (AIP). Maalmaha soo socda, dowladda waxay bilaabi doontaa qaab dhismeedka fulinta iyo kormeerka barnaamijka.
