Hoggaamiyaha Koonfur Galbeed oo Baydhabo ku qaabilay musharax Jawaari
Baydhabo, Abriil 28, 2026 – Hoggaamiyaha ku meel gaarka ah ee Dowladda Koonfur Galbeed Soomaaliya, Jibriil Cabdirashiid Xaaji, ayaa Aqalka Madaxtooyada ee Baydhabo ku qaabilay musharax madaxweyne Cabdicasiis Maxamed Sheekh Cusmaan Jawaari.
Kulanka ayaa ahaa mid wadatashi siyaasadeed, waxaana looga hadlay xaaladda guud ee siyaasadda, geeddi-socodka doorashooyinka iyo sidii loo xoojin lahaa wadajirka iyo xasilloonida deegaannada Koonfur Galbeed.
Hoggaamiye Jibriil ayaa soo dhoweeyay musharaxa, isagoo carrabka ku adkeeyay muhiimadda ay leedahay in doorashooyinka ay ku dhacaan jawi hufan oo cadaalad ah, isla markaana waafaqsan shuruucda dalka.
Dhankiisa, musharax Jawaari ayaa uga mahadceliyay soo dhoweynta, wuxuuna sheegay inuu ka go’an yahay ka shaqeynta horumarinta dowladnimada, nabadda iyo dib-u-dhiska Koonfur Galbeed.
Kulankan ayaa qeyb ka ah dadaallada socda ee lagu xoojinayo wadatashiyada siyaasadeed iyo diyaar garowga doorashooyinka ka socda deegaannada Koonfur Galbeed Soomaaliya.
