Golaha Wasiirrada oo meel-mariyey dhismaha xarunta adeegga “Halmeel”
Muqdisho – Golaha Wasiirrada Xukuumadda Jamhuuriyadda Federaalka Soomaaliya ayaa maanta kulankoodii toddobaadlaha ahaa ku meel-mariyey dhismaha xarunta adeegga mideysan ee “Halmeel”, oo hoos tagi doonta Xafiiska Ra’iisul Wasaaraha, isla markaana loo asteeyey isku dubaridka iyo horumarinta adeegyada dadweynaha.
Kulanka oo uu guddoominayey Ra’iisul Wasaaraha, Hamza Abdi Barre, ayaa diiradda lagu saaray sidii loo mideyn lahaa adeegyada dowladda, loona fududeyn lahaa helitaankooda si muwaadiniintu ay hal meel uga heli karaan adeegyo kala duwan oo isku xiran.
Xarunta “Halmeel” ayaa lagu sheegay mid ka shaqeyn doonta isku xirka hay’adaha dowladda, dib-u-habeynta adeegyada adag, iyo yareynta nidaamka xafiisyada badan, si loo kordhiyo hufnaanta iyo tayada adeeg bixinta. Sidoo kale, waxay fududeyn doontaa isdhaafsiga xogta hay’adaha dowladda, taas oo muwaadiniinta ka badbaadin doonta in xog isku mid ah marar badan meelo kala duwan lagu bixiyo.
Dhanka kale, Golaha Wasiirrada ayaa ansixiyey heshiis hoos yimaada United Nations ee sharciga badaha, gaar ahaan heshiiska ilaalinta iyo isticmaalka waara ee kala duwanaanshaha noolaha badda ee meelaha ka baxsan awoodda qaran (BBNJ Agreement).
Intii uu kulanku socday, waxaa sidoo kale lagu soo bandhigay warbixinno la xiriira amniga, dhaqaalaha, iyo xaaladda wabiyada dalka, kuwaas oo ay diyaarisay Wasaaradda Beeraha iyo Waraabka.
Ra’iisul Wasaare Xamse Cabdi Barre ayaa bogaadiyey ciidamada qalabka sida, kaddib markii warbixintii amniga ay muujisay horumar muuqda iyo hoos u dhac ku yimid falalkii amni darro ee dalka.
Ugu dambeyn, kulankan Golaha Wasiirrada ayaa muujinaya dadaallada dowladda ee ku aaddan casriyeynta adeegyada, xoojinta amniga, iyo horumarinta kaabeyaasha muhiimka u ah nolosha muwaadiniinta.
