Wasiiru-dowlihii Shaqada & Arrimaha Bulshada, Xildhibaan Caynaanshe Yuusuf Xuseen, iyo Wasiiru-dowlaha Baatroolka & Macdanta, Xildhibaan Ismaaciil Shire Buraale, ayaa ku dhawaaqay inay iska casileen xilalkoodii xalay.
Labadan mas’uul oo ka soo jeeda Puntland ayaa sheegay in sababta ay isku casileen ay la xiriirto diidmada wax ka baddelka dastuurka dalka, iyagoo ku dooday in isbeddellada lagu sameynayo uusan marin wadatashi ballaaran iyo habraac sharci oo dhameystiran.
Wax ka baddelka dastuurka ayaa muddooyinkii dambe ka taagnaa khilaaf xooggan oo kala qeybiyay xildhibaannada labada aqal ee Baarlamaanka Soomaaliya. Qaar ka mid ah mudanayaasha ayaa taageersan isbeddellada, halka kuwo kalena ay ku doodayaan in aan la raacin nidaamkii iyo wada-tashigii loo baahnaa.
Iscasilaadda wasiirradan ayaa la rumeysan yahay inay sii muujineyso kala aragti duwanaanta siyaasadeed ee ka taagan arrimaha dastuurka, taas oo saameyn ku yeelan karta wada shaqeynta hay’adaha dowladda.
