Madaxweynaha Mareykanka, Donald Trump, ayaa sheegay inuu rumeysan yahay in Iiraan ay doonayso inay heshiis ka gaarto barnaamijkeeda nukliyeerka.
Hadalkan ayaa yimid ka hor wareegga labaad ee wadaxaajoodyada aan tooska ahayn ee u dhexeeya wakiillada Mareykanka iyo Iiraan, kuwaas oo ka dhacaya magaalada Geneva, iyadoo ay dhexdhexaadineyso dowladda Cumaan.
Trump oo la hadlayay weriyeyaasha xilli uu saarnaa diyaaraddiisa Air Force One, ayaa sheegay inuusan u maleyneynin in maamulka Iiraan ay rabaan inay wajahaan “cawaaqibka ka dhalan kara inaan heshiis la gaarin.”
Dhanka kale, Wasaaradda Arrimaha Dibadda ee Iiraan, oo uu ku hadlay afhayeenkeeda Esmaeil Baqaei, ayaa sheegtay in Mareykanku u dhaqaaqay dhinac “macquul gal ah” oo ku saabsan wadahadallada la xiriira barnaamijka nukliyeerka ee Tehran.
Sidoo kale, isla kulankaas uu la yeeshay saxaafadda, Trump ayaa tilmaamay inuu “dhawaan” go’aan ka gaari doono arrinta ku saabsan dirista hub dheeraad ah oo loo diro Taiwan.