Midowga Afrika oo xaruntiisa ku taalla magaalada Addis Ababa ayaa waxaa weli ka socda Shir-madaxeedka 39-aad ee hoggaamiyeyaasha Afrika, kaas oo diiradda lagu saarayo “Hubinta helitaanka biyaha joogtada ah iyo nadaafadda waarta; gaaritaanka yoolalka Ajandaha 2063.”
Shirkan oo shalay furmay ayaa maanta sii wata wada-tashiyo ku saabsan ajendayaal kala duwan oo muhiim u ah mustaqbalka qaaradda. Iyadoo la raacayo dulucda shirka, hoggaamiyeyaashu waxay ka doodayaan muhiimadda biyaha nadiifta ah iyo nadaafadda, kobaca loo dhan yahay, dhismaha bulshooyin caafimaad qaba, ilaalinta nidaamyada deegaanka, iyo isticmaalka waara ee kheyraadka dabiiciga ah si loo hagaajiyo hab-nololeedka muwaadiniinta Afrika.
Sidoo kale, doorka biyaha iyo nadaafadda ee lagu xaqiijinayo Ajandaha 2063 ayaa si qoto dheer loo falanqeynayaa. Ajendayaasha kale ee miiska saaran waxaa ka mid ah horumarinta bulshada iyo dhaqaalaha, kobcinta kheyraadka aadanaha, dib-u-habaynta hay’adaha iyo maaliyadda, xoojinta iskaashiga gobolka, iyo doorka Afrika ee fagaaraha caalamiga ah.
Maanta waxaa sidoo kale la gorfaynayaa bilaabidda Aragtida 2026 ee Midowga Afrika, iyadoo shir-madaxeed heer sare ah oo ku saabsan maalgashiga biyaha iyo maaliyadda la qaban doono, kaas oo ay ka qeyb galayaan madaxda dowladaha Afrika.
Dhanka nabadda iyo amniga, guddiga sare ee Midowga Afrika u qaabilsan South Sudan ayaa ka wada hadli doona xaaladda ka jirta dalkaas, halka shir ay isugu imaanayaan wasiirrada dalalka Afrikaanka ah ee xubnaha ka ah Golaha Ammaanka ee Qaramada Midoobay (A3) la qaban doono. Dalalka Somalia, Democratic Republic of the Congo iyo Liberia ayaa matalaya Afrika.
Waxaa kale oo la qaban doonaa kulan ku saabsan horumarinta nidaamka caafimaadka adduunka iyo sida iskaashiga caalamiga ah loo xoojin karo. Guddoomiyaha Midowga Afrika ee Arrimaha Siyaasadda, Nabadda iyo Amniga, Bankole Adeoye, ayaa la filayaa inuu soo bandhigo warbixin ku saabsan xaaladda nabadda iyo amniga qaaradda.
Shirkan ayaa muujinaya dadaallada ay Afrika ugu jirto xal u helidda caqabadaha horumarineed, xoojinta iskaashiga qaaradeed, iyo dhismaha mustaqbal waara oo ay wadaagaan dalalka Afrika.