Madaxweynaha Soomaaliya Xasan Sheekh Maxamuud ayaa lagu wadaa inuu booqasho rasmi ah ku tago dalka Shiinaha, kaddib casuumaad rasmi ah oo uu ka helay dowladda Shiinaha, sida uu shaaciyay Wasiirka Arrimaha Dibadda ee Shiinaha Wang Yi.
Madaxweyne Xasan Sheekh ayaa inta uu joogo Shiinaha ka qeybgeli doona Shirka Shiinaha iyo Dalalka Carabta, halkaas oo uu kulamo gaar ah kula yeelan doono madaxda sare ee Shiinaha, kuwaas oo diiradda lagu saari doono xoojinta xiriirka laba geesoodka ah iyo iskaashiga istiraatiijiga ah ee labada dal.
Dowladda Shiinaha ayaa mar kale xaqiijisay taageerada buuxda ee ay u hayso midnimada, madax-bannaanida iyo wadajirka dhuleed ee Soomaaliya, iyadoo ballanqaadday in la xoojin doono iskaashiga dhinacyada amniga, difaaca iyo siyaasadda.
Sidoo kale, waxaa la filayaa in Madaxweyne Xasan Sheekh Maxamuud iyo Madaxweynaha Shiinaha Xi Jinping ay kulan rasmi ah yeeshaan inta lagu guda jiro shirka, sida lagu xaqiijiyay wada-hadal telefon oo dhexmaray Wasiirrada Arrimaha Dibadda ee labada dal.
Booqashadan ayaa lagu tilmaamay mid muhiim u ah xoojinta xiriirka istiraatiijiga ah ee Soomaaliya iyo Shiinaha, gaar ahaan dhinacyada siyaasadda, dhaqaalaha, amniga iyo horumarinta dalka.
