Madaxweynihii hore ee Soomaaliya Sheekh Shariif Sheekh Axmed ayaa xalay hoygiisa ku qaabilay Ra’iisul Wasaarihii hore Cabdi Faarax Shirdoon (Saacid) iyo Agaasimihii hore ee Hay’adda Nabad-sugidda Qaranka (NISA) Fahad Yaasiin Xaaji Daahir, kuwaas oo ka tirsan Xisbiga Midowga Haybad Qaran.
Kulanka ayaa diiradda lagu saaray is-xogwareysi ku saabsan xaaladda guud ee siyaasadda dalka, midnimada qaranka, dowlad-dhiska iyo mustaqbalka geeddi-socodka siyaasadeed ee Soomaaliya, xilli uu dalka wajahayo marxalad xasaasi ah oo ay taagan yihiin khilaafaad siyaasadeed iyo is-mariwaa la xiriira hannaanka doorashooyinka.
Mas’uuliyiinta ayaa si qoto dheer uga wada hadlay baahida loo qabo in la xoojiyo wadatashiga qaran, lana helo aragti mideysan oo looga gudbo caqabadaha siyaasadeed ee jira. Waxay isla qireen in talo-wadaag joogto ah iyo isu-tanaasul siyaasadeed ay yihiin furaha xal u helidda khilaafaadka dalka ka taagan.
Sidoo kale, kulanka waxaa si gaar ah loogu adkeeyay muhiimadda ku laabashada ku shaqeynta Dastuurka KMG ah, iyada oo la tixraacayo go’aamadii hore ee madasha Golaha Mustaqbalka, si loo helo xal siyaasadeed oo waara.
Ugu dambeyn, mas’uuliyiinta ayaa isla meel dhigay in marxaladda uu dalka marayo ay u baahan tahay bisayl siyaasadeed, isla markaana danaha qaranka laga hormariyo kuwa shaqsiyeed ama kooxeed, si loo dardar-geliyo dowlad-dhiska iyo xasilloonida siyaasadeed ee Soomaaliya.