Madaxweynaha Mareykanka Donald Trump ayaa hanjabaad adag u diray dowladda Iran, isaga oo uga digay in ay waxyeello u geystaan dibadbaxayaasha nabadeed ee ka mudaharaadaya xaaladda dhaqaale ee dalkaasi.
Trump ayaa qoraal kooban oo uu ku daabacay baraha bulshada ku sheegay in Mareykanku uu diyaar u yahay tallaabo degdeg ah, haddii ay Iran sii waddo caburinta mudaaharaadayaasha.
“Waxaan nahay kuwo diyaar ah, una diyaarsan inaan dhaqaaqno,” ayuu yiri Trump, inkasta oo uusan bixin faahfaahin dheeraad ah oo ku saabsan tallaabooyinka suuragalka ah.
Dhanka kale, lataliyaha sare ee hoggaamiyaha ruuxiga ah ee Iran, Ayatollah Ali Khamenei, ayaa ka jawaabay hadalka Trump, isaga oo uga digay in Mareykanku faragelin sameeyo. Wuxuu ku tilmaamay hadalka Trump mid halis ah, kana digay in tallaabo kasta oo Mareykanku qaado ay keeni karto qalalaase hor leh oo ka dhaca Bariga Dhexe.
Wararka ka imanaya Iran ayaa sheegaya in ugu yaraan sideed qof ay ku dhinteen mudaaharaadyo socday ku dhawaad toddobaad, kuwaas oo ka dhashay xaalad dhaqaale oo sii xumaaneysa, sicir-barar iyo shaqo la’aan baahsan.
Jimcihii, Trump ayaa mar kale qoraal ku daabacay bartiisa Truth Social, isaga oo yiri:
“Haddii Iran ay toogato oo ay si arxan-darro ah u disho dibadbaxayaasha nabadeed — taas oo ay caado ka dhigteen — Mareykanka wuxuu u imaan doonaa badbaadintooda.”
Hanjabaaddan ayaa sii hurisay xiisadda u dhexeysa Mareykanka iyo Iran, iyadoo indhaha caalamku ay ku sii jeedaan sida ay xaaladdu u wajahdo maalmaha soo socda.