Ilo-wareedyo ku dhow warbaahinta Israa’iil ayaa sheegaya in maamulka Israa’iil uu hadda ogaaday in xog juquraafiyeed aan dhammaystirnayn oo khaldan ay Somaliland horay u gudbisay, kahor isku daygii ay ku doonaysay aqoonsi caalami ah. Warbixin uu daabacay wargeyska The Jerusalem Post ayaa tilmaamaysa in sheegashooyinka dhuleed ee ay Somaliland soo bandhigtay, gaar ahaan waqooyiga Soomaaliya, aysan ahayn kuwo si buuxda u cad marka la eego xaqiiqada siyaasadeed iyo tan bulsho.
Warbixinta ayaa si gaar ah u iftiimisay in gobollada Sool iyo Sanaag, oo Somaliland ay ku darsato khariidadeeda, ay yihiin dhulal ay ka taagan tahay muran siyaasadeed iyo mid bulsho. Beelaha Dhulbahante iyo beelo kale oo ka tirsan Daarood ayaa lagu sheegay inay si cad u taageersan yihiin Dowladda Federaalka Soomaaliya, isla markaana aysan aqbalin sheegashada Somaliland.
Sidoo kale, jariidadda Jerusalem Post ayaa xustay in 14-kii Abriil ee sanadkan Dowladda Federaalka Soomaaliya ay qaaday tallaabo taariikhi ah, kaddib markii ay si rasmi ah u aqoonsatay SSC-Khaatumo inay noqoto Dowlad-Goboleedka lixaad ee Federaalka Soomaaliya.
Tallaabadan ayaa si weyn u beddeshay khariidadda siyaasadeed ee gobolka, iyadoo hoos u dhigtay sheegashada dhuleed ee Somaliland, kuna koobtay qiyaastii 45% dhulkii ay hore u lahayd Maxmiyaddii British Somaliland.
Falanqeeyayaal ku xeel dheer arrimaha Bariga Dhexe iyo Geeska Afrika ayaa tilmaamay in wacyigelintan cusub ay Israa’iil ku reebayso su’aalo culus oo la xiriira saxnaanta xogtii hore loo gaarsiiyay, gaar ahaan arrimaha xuduudaha iyo mowqifka dhabta ah ee shacabka ku nool dhulalka la sheeganayo.
Warbixinta Jerusalem Post ayaa sidoo kale muujisay in isku day kasta oo aqoonsi lagu saleeyo juquraafi muran ku jirto uu halis gelin karo xasilloonida gobolka. Dhanka kale, Dowladda Federaalka Soomaaliya ayaa mar kale adkaysay in xal waara lagu gaari karo oo keliya wada-hadal iyo ixtiraamka sharciga, iyada oo si cad u sheegtay in aysan marnaba gorgortan ka gelaynin midnimada iyo wadajirka dhuleed ee dalka.