Wasiirrada Arrimaha Dibadda ee dalal badan oo caalamka ah, oo ay ka mid yihiin Urdun, Masar, Aljeeriya, Qumooros, Jabuuti, Gambia, Iiraan, Ciraaq, Kuwayt, Liibiya, Maldives, Nayjeeriya, Cumaan, Pakistan, Falastiin, Qatar, Sacuudi Carabiya, Soomaaliya, Suudaan, Turkiga, Yemen, iyo Ururka Iskaashiga Islaamka (OIC), ayaa si wadajir ah u muujiyay mowqif mideysan oo ay kaga soo horjeedaan aqoonsiga ay Israa’iil 26-kii Diseembar 2025 siisay Somaliland.
Dalalkan iyo OIC ayaa si cad u sheegay in ay si buuxda u diidan yihiin tallaabadaas, iyagoo ku tilmaamay mid halis ku ah nabadda iyo amniga Geeska Afrika, Badda Cas iyo guud ahaan amniga caalamka, isla markaana muujinaysa iska indha-tirid cad oo sharciga caalamiga ah ah.
Waxay sidoo kale cambaareeyeen aqoonsigaas, iyagoo ku tilmaamay ku xadgudub weyn oo ka dhan ah mabaadi’da sharciga caalamiga ah iyo Axdiga Qaramada Midoobay, kuwaas oo waajib ka dhigaya ilaalinta madaxbannaanida iyo midnimada dhuleed ee dowladaha.
Dalalkan ayaa mar kale xaqiijiyay taageeradooda buuxda ee madaxbannaanida, midnimada iyo wadajirka dhuleed ee Jamhuuriyadda Federaalka Soomaaliya, iyagoo si adag u diiday tallaabo kasta oo wiiqeysa qaranimada dalka.
Waxay sidoo kale ka digeen in aqoonsiga qaybo ka mid ah dal madax-bannaan uu abuuri karo tusaale khatar ah oo dhaawacaya mabaadi’da aasaasiga ah ee sharciga caalamiga ah, isla markaana halis gelinaya nabadda iyo amniga caalamka.
Ugu dambayn, dalalkan ayaa si cad u diiday isku day kasta oo lagu xiriirinayo aqoonsigan qorshe kasta oo lagu doonayo in si qasab ah dadka Falastiin looga raro dhulkooda, iyagoo arrintaas ku tilmaamay mid gebi ahaanba ka hor imaanaysa mabaadi’da caalamiga ah.
