Dowladda Federaalka Jamhuuriyadda Federaalka Soomaaliya ayaa si cad u shaacisay inay gebi ahaanba iska diiday tallaabada ay Israa’iil ku sheegtay aqoonsiga Somaliland, iyadoo ku tilmaantay mid sharci-darro ah oo si toos ah u dhaawacaysa madax-bannaanida iyo midnimada dalka.
Bayaan ka soo baxay Dowladda Federaalka Soomaaliya ayaa lagu adkeeyay in Soomaaliya ay ka go’an tahay ilaalinta madax-bannaanideeda, midnimadeeda qaran iyo wadajirka dhulkeeda, kuwaas oo ku xusan Dastuurka Ku-Meel-Gaarka ah ee Jamhuuriyadda Federaalka Soomaaliya, Axdiga Qaramada Midoobay iyo Axdiga Aasaasiga ah ee Midowga Afrika.
Dowladdu waxay caddeysay in waxa loogu yeeray aqoonsiga Israa’iil ee Somaliland uu yahay tallaabo sharci-darro ah iyo weerar toos ah oo lagu soo qaaday qaranimada Soomaaliya. Waxay sidoo kale xustay in Somaliland ay tahay qayb aan ka go’i karin Jamhuuriyadda Federaalka Soomaaliya, isla markaana ay ka mid tahay dhulka qaranka Soomaaliyeed ee aan la kala saari karin.
Ugu dambeyn, Dowladda Federaalka Soomaaliya ayaa mar kale ku celisay mowqifkeeda adag ee ah in aysan marnaba aqbali doonin tallaabo kasta oo wax u dhimaysa midnimada, wadajirka dhuleed iyo jiritaanka qaranka Soomaaliyeed.